Lajme nga Saranda

Kryetari i Bashkisë së Sarandës, Adrian Gurma, në datat 4 e 5 tetor 2020, ishte pjesë e delegacionit të kryebashkiakëve të qyteteve bregdetare shqiptare, të cilët, me në krye Ministrin e Turizmit dhe Mjedisit, Blendi Klosi, vizituan pikat e turizmit dimëror në Kosovë.
Gjatë vizitave në Bjeshkët e Brodit në Dragash, ata morën shijen e resurseve të turizmit malor që Kosova ofron. Nuk kishte rast më të mirë për të shprehur mirënjohjen e thellë, që, nën moton “Pusho Shqip”, këtë verë destinacionet turistike të Shqipërisë u dominuan nga shqiptarë të Kosovës dhe trojeve të tjera shqiptare.
Njëherësh, gjatë këtyre guidave, u shpreh vullneti i plotë i kryebashkiakëve të Shqipërisë, për sipërmarrje reale që, me një fluks turistik të mirëorientuar nga Shqipëria drejt Kosovës, të arrihet të bëhen po kaq të vizituara në sezonin vjeshtë-dimër 2020-2021, Bjeshkët e bukura të Kosovës.
Me ndarjen e çertifikatave të mirënjohjes për përfaqësues të bizneseve e mediave kosovare, u bë përmbyllja e vizitës së Ministrit Klosi dhe kryebashkiakëve të Shqipërisë në Kosovë.

Pas riveshjes me shtresë asfaltike, po përfundon edhe plotësimi me sinjalistikën e nevojshme, në rrugët e brendshme të Lagjes Nr 4.

Me të moshuarit e Qendrës Polivalente, kaluam disa momente të gëzuara, në Ditën Ndërkombëtare të të Moshuarve.
Respekt dhe mirënjohje për kontributin tyre, dhënë ndër vite, si dhe mbështetje pa kufi në vijimësi për ata.

Duke respektuar rregullat, masat dhe distancën e përcaktuar për të parandaluar përhapjen e Covid 19, në sallën e Bashkisë së Sarandës, u zhvillua ditën e djeshme mbledhja e radhës e Këshillit Bashkiak.
Mbledhja e djeshme miratoi disa projektvendime, që lidhen me dhënien e ndihmës ekonomike për periudhën 1-31 gusht 2020 me fondin 6% të bllokskemës së ndihmës ekonomike, si dhe nga të ardhurat e Bashkisë. U miratua gjithashtu projektvendimi i Bashkisë “Mbi heqjen e detyrimit mujor financiar të ushqimit në kopshte dhe çerdhe për vitin shkollor 2020-2021”, si dhe të ardhurat dhe tavanet përfundimtare të shpenzimeve në nivel programi të buxhetit afatmesëm 2021-2023.
Këshilltarët u informuan dhe diskutuan mbi raportin e paraqitur nga ekzekutivi për shërbimet sociale dhe punën e qendrave të shërbimit komunitar, çka ishte një ndihmë e mirë për ta përmirësuar shërbimin në këto qendra. Pjesë e rendit të ditës dhe objekt i diskutimit të këshilltarëve, u bë edhe raporti i monitorimit të zbatimit të buxhetit për 4 mujorin e dytë 2020, ndërkohë që u vlerësua shumë pozitivisht manaxhimi që u është bërë kullotave dhe pyjeve nga Drejtoria e Bujqësisë në Bashki.
Këshillit Bashkiak iu paraqit një informacion edhe për ecurinë e deritanishme të procesit të aplikimeve për trojet e ndërtimit, në zbatim të VKM 329, datë 22.05.2019.